Edvard Kristinn Guðjónsson

Ný bloggsíða

Sat, 28 Jan 2012 00:33:56 GMT

http://blogg.visir.is/edvard

Mannkostir

Tue, 24 Jan 2012 08:46:26 GMT

Sjálfur hef ég hitt nokkra siðblindingja um ævina. Stórhættulega einstaklinga sem voru á leiðinni á toppinn ef þeir voru ekki komnir þangað þá þegar. Vanalega næstir í röðinni að stjórnunarstöðu og tilbúnir að gera allt til að hljóta hana.

Og alltaf skal ég lenda á þeim. Bara vegna þess að ég bý yfir þeirri bölvun að sjá stundum í gegnum fólk við fyrstu kynni. Finn lyktina af ómennum lengri leiðir. Verst að þessir andskotar tóku mig sjaldnast í viðtöl og réðu, heldur yfirmenn þeirra. Mun viðkunnalegri einstaklingar sem ilmuðu af góðmennsku og sanngirni.

Siðblinda

Tue, 24 Jan 2012 07:26:30 GMT

Þóra Arnórsdóttir ræddi við kanadískan sálfræðing í Kastljósi í gærkvöldi um siðblindingja. Sá hafði áður starfað í fjölda ára í kanadísku fjallalögreglunni og kynnst ýmsu misjöfnu. Talið er að 89% siðblindingja séu karlar og 11% konur.

Einfaldasta lýsing á siðblindingja (psychopath) er sú að hann hugsar aðeins um eigin hag og getur ekki sett sig í spor annarra. Síst af öllu fórnarlamba sinna. Hann er oftast vel gefinn og framagjarn. Margir viðskiptajöfrar eru siðblindingjar og gengur þeim mörgum vel að leyna geðvillu sinni.

Nema íslensku útrásarvíkingunum. Þeir komu allir upp um sig í hruninu. Fundu enga sök hjá sjálfum sér. Sökin var okkar hinna. Fórnarlamba þeirra.

Sami maðurinn

Tue, 24 Jan 2012 06:53:21 GMT

Flestir útvarpsþættir fara í taugarnar á mér. Sérstaklega síðdegisþættir Rásar 2 og Bylgjunnar þar sem nánast sami gaurinn er við stjórnvöllinn. Hallgrímur Thorsteinsson og Þorgeir Ástvaldsson eru einn og sami maðurinn í hlustum mér.

Jafn þungir á sér og gefnir fyrir að gjamma að viðmælendum sínum. Engu líkara en að þeir nenni ekki að vera þarna og fyrirlíti alla sem villast inn í viðtöl til þeirra. Ferlega þreyttir persónuleikar sem ættu að segja upp störfum sínum því augljóslega þorir enginn að segja þeim upp af fyrra bragði.

Rafmagnsleysi

Tue, 24 Jan 2012 06:37:30 GMT

Rafmagninu var slegið af milli miðnættis og morguns um daginn vegna viðhalds. Vissi ekki af því fyrirfram því enginn nennir að bera út tilkynningar í kjallarakompur eins og mína. Við mætum afgangi hjá flestum nema bréfberum.

Lá eins og aumingi með vasaútvarp í eyrunum og reyndi að sofna með engum árangri. Hálftvö hringdi ég í bilanavakt Orkuveitunnar og fékk á hreint hvað væri í gangi. Lá restina af nóttinni með vasaútvarpið í eyrunum. Allt þar til að rafmagninu var komið aftur á rétt fyrir sjö. Þá loks festi ég svefn.

Minnti mig á þegar rafmagnið fór af síðdegis einn vetrardag þegar ég var ca. tíu eða ellefu ára að bera út DV. Djöfull var draugalegt að labba heim úr Snælandshverfi yfir í Kjarrhólma. Stöku kertaljós úti í glugga. Nánast enginn á ferli nema ímyndaðir draugar í höfði mér.

Hvaða hrun?

Tue, 24 Jan 2012 06:13:14 GMT

Tíma þingheims og fjölmiðla er eytt í að ákveða örlög eins manns : Geirs Hilmars Haarde. Á meðan má þjóðinni blæða út undan krumlum vogunarsjóða sem núverandi og fyrrverandi ríkisstjórn veittu stjórn bankanna í aumingjaskap sínum.

Vilji einhver halda fasteign sinni skal viðkomandi gjöra svo vel að skrifa undir þrælasamning sem viðkomandi endist ekki lífið til að greiða upp. Afa og ömmubörnin ná því kannski í sinni elli.

Og flestum er andskotans sama því að ballið verður duna áfram. Neyslan að fara aftur í gang. Greiðslukortin að syngja á ný í raufum posanna. Enginn tími til að hugsa um komandi kynslóðir. Stundin er núna!

Ísland

Tue, 24 Jan 2012 05:36:51 GMT

Djöfuls óveður fyrir utan gluggann. Get ekki sofið frekar en áður þegar svona viðbjóður gengur yfir borgina. Tveir mánuðir liðnir síðan ég leit auða jörð. Andskotans hvíti viðbjóður sem á heima á fjöllum en ekki á götum höfuðborgarsvæðissins!

Síðustu vetur hafa verið svo mildir að ég er orðinn of góðu vanur. Ekki það að snjórinn hafi verið mikill heldur einstaklega viðvarandi. Hlákurnar hafa ekki náð að eyða honum milli hríða. Fer virkilega í taugarnar á mér.

Get víst búist við tveimur mánuðum í viðbót af þessu hvíta ógeði. Oj, bara! Vorkenni blaðburðarfólki og bréfberum. Eins og störf þeirra séu ekki nógu erfið og illa launuð fyrir.

Iðrun eða sannfæring

Tue, 24 Jan 2012 03:57:40 GMT

Hef algjörlega hætt að kaupa vörur frá Kjarnafæði eftir að stjórinn þar svaraði því til í svo mörgum orðum að götusöltuðu vörurnar þeirra væru bara andskoti nógu góðar ofan í okkur lýðinn. Við ættum ekkert að vera kvarta. Þar yrði sko unnið sig í gegnum birgðirnar af iðnaðarsaltinu áður en skipt yrði yfir í manneldissalt.

Engin iðrun þar á bæ ólíkt en hjá stjóra Ölgerðarinnar sem virðist skammast sín fyrir þrettán ára ólæsi og skort á lesskilningi meðal starfsfólks síns. Segist ætla að bæta sig í framtíðinni.

BlogCentral.is lokar

Tue, 24 Jan 2012 02:40:42 GMT

Jæja, þá er loksins komið að því. BlogCentral fer að loka á næstu vikum. Eins gott að ég er búinn að afrita megnið af því sem hér hefur birst. Best að einhenda sér í að afrita restina. Veit ekki hvort ég nenni að færa mig yfir á blogg.visir.is. eins og er í boði.

Kannski er þetta skýrt merki um að hætta þessu bloggrugli. Nennir enginn lengur að lesa lengri texta en sem nemur færslum á Facebook eða Twitter. Bloggið er að smá saman að deyja út nema í úrdráttarformi á fyrrgreindum síðum. Nenna fáir að lesa sjálfar greinarnar til enda sem vitnað er til.

Ísmaðurinn ógurlegi

Thu, 19 Jan 2012 03:22:10 GMT

Breyttist í Hulk (græna risann) í gær og réðst loks á ísskápinn. Sást ekki lengur í frystihólfið fyrir ísjakanum sem hafði tekið sér þar bólfestu. Ástandið inni í sjálfum skápnum var furðu gott. Engar úldnar matvörur syngjandi innst inn í neðstu hillu.

Jökullinn var engin smásmíði þegar ég loks náði honum út í nokkrum pörtum. Reyndi ekki einu sinni að þíða hann í vaskinum og fleygði honum frekar út til ættingja sinna hérna fyrir utan. Þó ekki fyrr en ég var búinn að týna úr honum eldgamlar sænskar kjötbollur og fleira drasl sem ég hef engan áhuga á að elda.

Var orðinn svo óður að ég þreif meira að segja á bak við skápinn og undir honum. Fann þar jólabækling frá Nóatúni síðan 2010. Verðin voru aðeins viðkunnalegri þá. Og einhverja happdrættismiða. Engir leyndir fjársjóðir.

Dagleg geðvernd

Mon, 16 Jan 2012 06:38:58 GMT

Til að halda einhverju af geðheilsunni þá skrifa ég á netið. Annað endar ofan í skúffu. Ég er sífellt krotandi einhverja vitleysu til þess eins að drepa tímann og heilasellurnar. Ef ekki væri fyrir skrif lægi ég lengur upp í rúmi og svæfi eins og tröll.

Að koma orði á blað tæmir heilann af versta ruglinu sem safnast þar yfir daginn. Ég verð helst að sjá suma hluti á blaði áður en ég framkvæmi þá. Það eru bókstaflega skrifblokkir og pennar í flestum herbergjum íbúðarinnar. Annars líður mér hálf illa.

Ég geng oftast með penna og blokk á mér. Og lítinn og löglegan hníf. Kann ekki við að verða myrtur án mótspyrnu. Er eitthvað svo aumt. Annars er hann bara til hughreystingar rétt eins og þegar ég var blaðberi sem unglingur.

Myndi aldrei nota hníf. Krefst of mikillar nándar. Kannski eins gott að ég á enga byssu því hana myndi ég ef til vill nota. Krefst engrar nándar. Annars er lítil hætta á árás nema maður sé dópsali eða á djamminu niður í miðbæ.

Auðvitað tómt rugl að ganga með vopn. Skárra að láta stúta sér með hraði heldur en að láta það dragast á langinn langt fram eftir nóttu.

Skelin

Mon, 16 Jan 2012 05:07:07 GMT

Hleraði samtal öldungs við strætóbílstjóra þegar ég var tíu ára. Sá gamli sagði að við værum bara sálir sem fengjum vist í líkömum fram að dauðdaga. Líkaminn væri bara skel utan um sál sem færðist svo yfir í annan líkama óháð kyni.

Út frá þessum viskukornum dróg ég þá ályktun að samkynhneigð skipti engu máli. Ástin spyr hvorki um stétt, stöðu eða kyn. Sálir laðast að hvorri annarri óháð líkamsskel. Að geta búið til barn saman er ekki lokamælikvarðinn á ást tveggja einstaklinga.

Þakka þessum gamla manni fyrir að þjást ekki af hommafóbíu í dag. Þar með er einni fælninni færri fyrir að fara í lífi mínu.

Tár falla

Mon, 16 Jan 2012 03:34:04 GMT

Konur gráta yfir ástarmyndum vegna þess að þær óska þess að hafa valið skárri maka. Karlar væla yfir stríðsmyndum vegna samviskubits yfir að hafa ekki tekið þátt í stríði. Sagan líður frjamhjá á stofusófanum. Við tökum ekki lengur þátt nema með grátkirtlunum.

Lyfleysa

Mon, 16 Jan 2012 02:11:23 GMT

Fór í síðustu viku og leysti út lyf. Bjóst við tugþúsunda reikningi í smettið samkvæmt nýjum lyfjalögum velferðarráðherra. En nei, eru ekki enn orðin að lögum. Frumvarpið er enn í velferðarnefnd eftir fyrstu umræðu síðan fyrir jól. Smá svikalogn á undan storminum.

Finnst alltaf jafn fyndið þegar ráðherrar halda því fram að eftir breytingar munu skattgreiðendur borga minna fyrir lyf þegar reyndin virðist allt önnur í reiknivélum landsmanna. Breytingum er aldrei þvingað í gegn nema til að fá meira í ríkiskassann. Ekki til að létta okkur aumingjunum róðurinn.

Salt í grautinn

Mon, 16 Jan 2012 00:54:26 GMT

Glæsilegt! Búinn að innbyrða iðnaðarsalt árum saman án þess að vita það. Fær mann til að velta fyrir sér hvaða annan viðbjóð ég er að láta ofan í mig. Hverju get ég treyst? Líklega engu upp úr þessu.

Eftirlitsstofnanir landsins eru bara upp á punt. Nýta sér aldrei valdheimildir sínar af ótta við að vera lagðar niður í kjölfarið af sömu pólítíkusum og komu þeim á ríkisjötuna.

Áratugum saman var logið að skólabörnum að Danir hefðu selt okkur maðkað mjöl fyrir morðfjár. Hið sanna var að maðkað mjöl var lenskan á þessum tíma. Og það kostaði mikið að sigla með vörur hingað norður í rassgat og fámenni.

Íslenskir framleiðendur eins og Ölgerðin virðast hafa tekið þessa uppdiktuðu Dani til fyrirmyndar og seldu okkur annars flokks salt til matargerðar í þrettán ár. SS seldi okkur mengaðan áburð. Enginn mátti segja neitt. Gróðinn var fyrir öllu. Heilsa almennings var aukaatriði.

En eins og alltaf mun enginn bera ábyrgð á gjörðum sínum. Slíkt þykir ekki fínt á Íslandi.